Baluarte Musikal ta Haña Nòmber di Kaya

WILLEMSTAD - Na okashon di nombramentu di 40 kaya den bario di Oost Jongbloed, Liverpool, Bonam, i Kiringdongo Abou riba 9 di Mei 2008, Gobièrnu di Kòrsòu i Komishon Nòmber di Kaya di Kòrsòu ta nombra un kaya na nòmber di Vivienne Lucille Frans q.e.p.d. Vivienne L. Frans - 13 di dezèmber 1948 - 14 di mei 1999 - Vivienne tabata tin 10 aña dia ela hasi su promé aparishon komo kantante dilanti di un publiko grandi den "Shell Recreatie Centrum" na Suffisant, riba un Dia di Mama. Vivienne a kanta un kantika di Dugo Schenker "Het Schoonste der Wereld is Mijn Moeder Alleen". Ela risibi un gran ovashon di tur presente ku tabata tey na e evento. Na edat di 17 aña, Vivienne a pasa pa forma parti di e grupo musikal "Los Ecos", ku despues a bira grupo di show "The Polyglots". Huntu ku "The Polyglots" Vivienne a graba hopi piesa, i a duna diferente presentashon na paísnan manera Colombia, Venezuela, Santo Domingo i otro nan. Na Yüni 1973, Vivienne a partisipá na Festival di Kansion pa Antias. Ela gana komo bos femenino mas sobresaliente. Danki na esaki Vivienne a haña e oportunidat pa partisipá na "Festival Internacional de la Cancion y la Voz de Puerto Rico" ku e piesa "Hoy Quisiera Verte", i a sali komo di 4 finalista den un total di 27 pais i 58 kantante. E gran Kompositor Portorikeño "Don Pedro Flores" na e okashon ey a menshoná publikamente ku Vivienne Frans tabata su faborito bou di tur e partisipante nan. E ultimo aña nan di Vivienne su bida, promé ku ela pasa pa un mehor bida, ela dedika su talento ku alma i kurpa na Señor, kantanto kantikanan di alabansa na dj´E ku e Koro "Vivienne Frans i Kompania" ku tabata bou di su direkshon. "Vivienne Frans i Kompania" a kumpli e aña aki 24 aña di eksistensia. Riba 14 di Mei 2008, nos ta rekordá 9 aña di fayesementu di La Primerisima Vivienne Frans.

Adelheid Rojer: Homenahe na Vivienne Frans