Señor Ta Nase Tur Dia

Manera semper Hesus su manera di aktua ta basá den amor...

I siendo di kondishon divino, Eta legumai Su rango pa kompartí ku nos, nos kondishonnan humano. Tabata sper'É komo un hende riku i Ela nase den pobresa; tabata spera un gueriero i Su àrmanan tabata pordon i pas. Ela hasi Su revolushon pa medio di amor, i signo di Su triunfo tabata e palu dje krus.

Dios a bira hende, pa esun ku ta biba den skuridat i sombranan di morto
por biba den lus; pa esnan ku ta biba den piká lanta i eksperensiando
mizèrikòrdia di Señor, biba den grasia; pa esnan ku ta sinti nan mes só
i abatí, sá ku nan tin É Todopoderoso banda di nan; pa esnan ku ta sufri
i yora, tin konsuelo; pa esnan ku ta pasa dor di inhustisia i violensia,
eksperensiá pas.

Si ta p'esaki Señor a bini, nos lo por bisa ku Señor ta nase tur dia den
tur kurason ku ta habrí pa risibi'É, komo sifuera e kurasonnan ey ta un
pesebre yen di goso, no unikamente pa kanta, pero tambe pa duna gloria
na Dios pa su obranan, i ta hasi esfuerso pa mantené pas entre hende.

Señor ta nase tur dia den e hogarnan ku ta komunidatnan di bida i amor,
kaminda esposonan, mayor i yunan ta hasi esfuerso pa komprendé i stima
otro.

Señor ta nase tur dia den e personanan ku ta den kunuku, fabrika,
ofisina, ku ta bai kumpliendo ku nan labor di tur dia, sin egoismo ni
envidia.

Señor ta nase tur dia den hospitalnan, kaminda e enfermo i e personal
tin ku lucha kontra enfermedat i morto, i ta pone tur nan konosementu i
esfuerso na sirbishi dj'É i di bida.

Señor ta nase tur dia den medionan di komunikashon, ku ta transmití nos
e bèrdat sin manipulashon.

Señor ta nase tur dia den skolnan, kaminda maestronan ta eduká i ta bai
formando no unikamente ku palabra, sino tambe ku ehèmpel.

Señor ta nase tur dia den e outoridat i lidernan, kende ku honestidat ta
buska hustisia, desaroyo i pas pa bienestar di nan pueblo.

Señor ta nase tur dia den personanan ku ta konsagrá nan bida na Dios, i
ta biba nan kompromiso ku fidelidat, sirbiendo Kristu huntu ku nan
rumannan.

Señor ta nase tur dia den mi kurason,

Monique Rebecca Crafton-Curiel