“Señor, Abo ta nos Tata; nos ta e klei i Abo ta modelá nos”

Nos ta den temporada Atvènt

ku ta nifiká “Esun ku ta bini, òf Esun ku mester bini”, i ku esaki Liturgia ke yuda nos pa prepará nos mes pa risibí Esun ku “tin ku bini”, kier men Kristu Glorifiká.

“Bolbe, pa amor di Bo sirbidónan Señor, Abo ta nos Tata; nos ta e klei i Abo ta modelá nos”. Nos ta rekonosé Dios komo orígen di e hende i fuente di tur sentido.

Den Evangelio nos ta rekonosé dos personahe: e doño di kas i e pòrtir. E doño, ku ta representá Dios, a sali i lo regresá algun dia, ora ku ménos e pòrtir ta sper’é (nifikashon di anochi) i e tarea di e pòrtir ta, pa kuida e kas p'asina su hefe lo hañ’é ta realisá e tarea ku el a enkarg’é kuné. Aki nos ta haña dos tema masha interesante pa meditá ariba. Di un banda e realidat ta, ku nos tur ta poseé den nos interior, un deseo, un anhelo di Dios (nos Tata) ku ta laga nos sklama di hopi manera “bini Señor”; i di otro banda, e promesa di Dios ku sigur lo bini, pues E ta fiel na su Palabra i algun dia lo E bini bèk pa realisá e union definitivo aki entre Dios i hende. Ta p'esei Hesus ta pidi nos: “sea alèrta”.

Laga nos kòrda ku nos ta únikamente pòrtir di e kas, ku e doño lo bini bèk un dia p'asina nos dun'E kuenta di nos trabou. Laga nos rebibá nos kompromiso ku “e Doño di kas”; kiko nos a hasi ku loke El a konfia na nos kuné?

“Bolbe serka nos”; laga nos meditá bon riba esaki, pasobra di esaki Atvènt ta trata, esta pa reflekshoná riba nos vokashon pa biba den union perfekto ku Dios.