Dia di Himno i Bandera

"Selebrá Dia di Bandera identifikando Bo mes"

Origen di Bandera di Kòrsòu

Gobiernu di Kòrsòu, pa medio di su desishon fecha 12 di mei 1981 no. 81/1170, a instalá un komishon ku a haña komo tarea, bini ku un proposishon pa asina yega na un bandera pa Teritorio Insular di Kòrsòu. E komishon a tene un konkurso. For di e mil shete shen (1700) diseño ku a drenta, e Komishon di Bandera a saka dies i finalmente Konseho Insular di Kòrsòu a skohe e aktual bandera for di e dies diseñonan. E diseñado di Bandera di Korsou ta señor Martin den Dulk.

Kolornan

E kolor blòu di e bandera di Kòrsòu ta ultra marino i e kolor hel ta hel lamùnchi. E faha mas ariba ta simbolisa nos shelu, mientras ku e faha mas abòu ta simbolisá e laman ku ta rondoná Kòrsòu. E kolor blòu ta simbolisá fieldat di nos pueblo. E faha hel ta simbolisá nos solo skèrpi i e karakter alegre di nos pueblo. E sinku pùnta di e streanan ta simbolisá e sinku kontinentenan di unda e diferente gruponan di poblashon di Kòrsòu a sali. Strea ta simbolisa konfiansa, speransa i espektativa. E kolor blanku di e streanan ta simbolisá pas i felisidat ku nos tur ta aspirá. Esakinan ta e faktornan esensial pa e metanan di un pueblo ku ta buska su kaminda entre estado i pueblonan.

Himno di Kòrsòu, kantá pa Elique i Julianne Curiel

Promé kùplèt
Lanta nos bos ban kanta
grandesa di Kòrsòu;
Kòrsòu isla chikitu,
Baranka den laman!

Kòrsòu nos ta stima bo
ariba tur nashon.
Bo Gloria nos ta kanta
di henter nos kurason.

Di dos kùplèt
Nos pueblo tin su lucha,
ma semper nos tin fe
di logra den tur tempu
viktoria ku trabou

Ban duna di nos parti
p’e isla prospera.
Laga nos uni forsa
p’asina truinfa.

Di tres kùplèt
Nos patria nos ta demostra
Honor i lealtat
meskos na e bandera
union di nos nashon

Nos bida lo ta poko
pa duna nos pais,
luchando uni pa libertat
amor i komprenshon.

Di kuater Kùplèt
I ora nos ta leu fo’i kas
nos tur ta rekordá
Kòrsòu su solo i playanan
orguyo di nos tur.

Laga nos Gloria Kreador
tur tempu i sin fin,
k’ El a hasi nos digno
di ta yu di Kòrsòu!